Egypt President hlui Mubarak a thi

Egypt president hlui Hosni Mubarak chu kum 91 mi niin nimin khan a thi. 

Hosni Mubarak hi kum 30 dawn thuneihna a chan hnuah kum 2011 khan sipai chakna hmangin Egypt President aṭanga paihthlak a ni. Paihthlak a nih hnuah a kaihhruai sorkar duh lohna lantirtu mi eng emaw zat kahhlumnaah mawhphurtua puhin thubuai siamsak a ni a, kum 2012 khan thiam loh chantirin, dam chhung tang tura hrem a ni. Mahse kum 2017 khan appeal court chuan a thubuai hi ngaihtuah ṭha leh tura tiin, hemi kum March thla khan thiam changin chhuah zalen a ni. 

Kum 2015-ah sorkar sum tichingpena puhnaah Mubarak leh a fapate pahnih chu thiam loh chantir leh niin, kum thum tang tura hrem an ni leh. 

Kum 2011-a man a nih aṭangin Mubarak hi a hriselna a ṭha lo chho hle a, jail hospital-ah pawh hun eng emaw chen enkawl a lo ni tawh. Chhuah a nih hnuah pawh enkawl zui reng a ni a, January thla khan zai a ni. Mahse ṭhat lam pan thei loin, Cairo-a Galaa military hospital-ah nimin khan a thi tih state TV chuan a puang.