Covid-19 : Ram 60-ah a darh tawh
World Health Organisation (WHO) chuan nimin thleng khan Covid-19 vanga thi chu khawvel pumah mi 2,976 an tling tawh a, he hri leng mek hi ram 60-ah a darh tawh tih a sawi.
Ireland, Ecuador, US, Thailand leh Australia-ah te he hri vanga thi an awm thu WHO chuan nimin khan a tarlang. Hetih lai hian US president Trump chuan engmah thlabar phahna tur a awm lo, he hri hi tih rem a nih theih nan US chuan theihtawp a chhuah zel dawn a ni, tiin an ram mipuite a thlamuan.
China-ah chuan nimin khan hri kai thar hi mi 573 an awm a, mi 35 an thih bakah he hri hi mi 86,000 chuangin an kai tawh bawk. Hong Kong-a ui-in Covid 19 hri hi a kai tih hriatchhuah a ni a, he ui hi Covid 19 hri vei mek chhungte ta
a ni. Mihring aṭangin engtin nge a kaichhawn theih tih chu hriatchian a ni lo thung.
Nimin vek khan South Korea-ah hian hri kai thar hi mi 210 an awm a, hri leng mek avang hian biakinte pawh khar a ni. Mahse Youtube lamah live-in sermon pekchhuah a ni thung. SKorea hi China tih lohah chuan he hri kai tamna
ber niin, mi 3,736-in an kai tawh a ni. Hetih lai hian Vietnam chuan an rama Covid-19 vei mi 16-te chu enkawl dam vek an ni tawh a, damdawiin aṭangin chhuah tir vek an ni tawh tih a sawi.