Europe ramten Venezuela acting president Guaido pawm

Europe ram ṭhenkhat, France, Spain, Germany, Britain, Portugal, Sweden, Austria leh Netherlands te chuan Thawhṭanni khan Venezuela eptu hruaitu, Juan Guaido chu Venezuela acting president-ah an pawm thu an puang. 

Juan Guaido-an an ram acting president-a a in puan hnuaah Venezuela tualchhung politics buaina hi a nasa chho zel a, Europe ramte hian President Maduro chu an buaina chinfelna tura inthlan buatsaih turin an nawr a ni. Inthlan buatsaih tur hian ni riat hun pein Pathianni khan a tawp a,  mahse an hun pek chhunga inthlan hi buatsaih a nih tak loh vangin Venezuela ram hruaituah Guaido hi an pawm ta a ni. Guaido hi US leh Latin America ram ṭhenkhat chu an thlawp thu an lo sawi tawh bawk. 

Latin America leh Canada ram awmna, Lima group pawhin Juan Guaido chu interim president a an thlawp thu an sawi bawk. Lima Group member 14 zinga 11 chuan thuchhuah siamin, Venezuela ramah chuan tihluihna hman kher ngai loa thuneitu thlak a ngai a ni tih sawiin, mipuite pawhin chhawmdawlna an mamawh hle tih an sawi. Mahse member pathum - Guyana, Mexico leh St Lucia chuan an pawl thuchhuah hi an thlawp lo thung. Lima Group hi Venezuela tualchhung buaina chinfel dan kawng ngaihtuah pui tura kum 2017-a an din a ni.  

Hetihlai hian Russia leh China chuan Maduro hi an thlawp thung a, Russia chuan Venezuela ramchhung inrelbawlnaa inrawlhah ramdangte a puh. Hetianga ram dangte inrawlh hian Venezuela buaina tawh mekah boruak ṭha a thlen lo zawk niin Russia President Vladimir Putin-a thupuangtu Dmitry Peskov chuan a sawi. 

President Maduro chuan ramdangte nawrna laka inhnuhhniam a tum loh thu a sawi leh a, Venezuela-in oil a thawnchhuahna kawnga hrekna siamtu, EU leh US a dem thu a sawi bawk. Maduro chuan TV-a thu a sawiah eng ram hnen aṭang maha thupek a lak dawn loh thu a sawi. An ram politics buaina tawh mek chuan tualchhung indona a chawk chhuak lo ang tih a sawi theih lo thu a sawi bawk.