NKorea-ah US special envoy kal dawn

US State Department chuan US special envoy for North Korea chu US President Donald Trump leh North Korea hotu Kim Jong-un te summit vawi hnihna neih tura inbuatsaihna neiin tur North Korea-ah a zin dawn tih a sawi. 

US special envoy Stephen Biegun hian NKorea khawpui Pyongyang-ah NKorea palai Kim Hyok Chol chu meeting a neihpui dawn a ni. Pathianni-a CBS in a kawmnaah, President Trump chuan Kim nena summit vawi hnihna an neih tur hi tihfel a ni tawh tih sawiin, ram pahnihten Korean Peninsula aṭanga nuclear ralthuam tihbo a nih theihna turin inremna an siam theih ngei pawh a beisei thu a sawi. 

Kumthar thuchah a sawinaah pawh Kim hian US President nena inbiakna neih leh tura a inpeih thu leh, inbiakna hlawhtling leh awmze nei siam tura theihtawp a chhuah tur thu pawh a lo sawi tawh a ni. 

Trump-Kim summit neih leh tur buaipui a nih mek lai hian United Nations chuan NKorea hian nuclear leh ballistic missile programme a la kalpui chhunzawm reng niin a sawi thung a, heng ralthuam siamna hmunte chu sipaiten an beih pawha chhe mai lo turin a thuam mek a ni, a ti. Thawhṭanni khan report hi UN Security Council sanctions committee hnenah thehluh a ni.