Hong Kong : Nawrh huaihawtten legislative building luhkhung tum

Hong Kong sorkarin sawisel hlawh tak, extra­dition bill siam a tum avanga mipuiten lungawi lohna an lantir chu chhun­zawm zel a ni. Nimin khan nawrh huaihawtte chuan Legislative Council building luhkhung an tum a, police-ten lo dangin an innawr buai hle. 

Hong Kong Chief Exe­cutive Carrie Lam chuan bill hi tihtawp lailawk a ni tih sawi mah se, mipuite chuan he bill hi sut nghal turin an phut a, Carrie Lam pawh Hong Kong hruaitu a nihna aṭanga bang turin an phut bawk. 

Sorkar laka lungawi lote hian Legislative Council building luhkhung tuma an beihnaah tukverh leh darthlalang kawng­kharte an tichhia a, police-te chuan mipuite hnawhdarh nan hian pepper spray te an hman phah a ni. 

Extradition bill vang hian tunhnaiah Hong Kong-ah nawrhna lian tham huaihawt a ni fo a, nawrh huaihawt lian ber ṭumah chuan mi maktaduai hnih chuang zet an tel a ni. Nawrh huaihawt vang hian buaina pawh a chhuak fo a, police-te chuan mipui  hnawhdarh nan pepper spray leh tear gas-te an hmang a ni. Britain chuan kar kalta khan Hong Kong hnena tear gas hralh a lo khap tawh a ni. 

Nawrh huaihawtte hian extradition law ṭhiah vek an phut a, hei bakah nawrh huaihawt avanga man tawkte chhuah an phut tel bawk.