Venezuela sipaiten chhawmdawlna phurtute an dang

Venezuela President Nicolas Maduro thlawptu sipaite chuan Colombia ramri  an dang a, hei vang hian eptu hruaitu leh acting president-a inpuang, Juan Guaido-a remruata mipuite chhawmdawlna pek tur pawh lakluh theih a ni lo. 

Guaido hi acting president-ah inpuangin, US bakah ram dang eng emaw zatin Venezuela hruaitua an pawm thu sawi mah se, President Nicolas Maduro chuan dan ang taka Venezuela ram president atana thlan tlin a nih thu a sawi a,  sipaite pawhin Maduro hi an thlawp a ni. 

Ramchhung politics buaina avang leh, hun rei tak chhung an ramin sum lamah harsatna a tawh avangin mipuiten an tuar nasa tawh hle. Thil man a sang chakin, an duh khawp ang lei tur pawh mipuiten an nei thei lo a ni. Hei vang hian mi tam tak chu dinhmun ṭha zawk beiseiin ramdangah an tlanchhe nasa tawh hle a ni. 

Juan Guaido-a ruahmanna anga ram mipuite chhawmdawlna tur phurtu motor liante hi Venezuela sipaite chuan an luh remtiloin Colombia leh Venezuela inkalpawhna, Tienditas lei chu an lo dang a ni. 

US Secretary of State Mike Pompeo chuan Venezuela sorkar hnenah Colombia ramri chu hawng turin a ti a, Venezuela mipute chuan chhawmdawl an ngai a, US leh ramdangten ṭanpui tum mah se Maduro-a thupekin sipaite chuan truck leh tanker-te chu an lo dang tlat niin a sawi. Mipui rilṭama awm mekte ṭanpui an nih theihna tura an luh phalsak turin a ti.

Eptu hruaitu Juan Guaido chuan chhawmdawlna hi sem a nih loh chuan mi 300,000 vel rilṭamin an thi mai dawn niin a sawi. Eptu pawl hruaitu hrang hrangte chuan chhawmdawlna phurtu motor-te hi luh phalsak turin sipaite an ngen. 

Hetihlai hian Maduro chuan chhawm-dawlna phurtu motor-te hi luhtir an nih chuan US in an ram a lak bul ṭanna tur a ni tih a sawi a, tumah luhtir an ni dawn lo a, sipai pakhat pawh luhtir an remti dawn lo tih a sawi. 

Guaido hi acting president-ah inpuang mah se ram chhungah thuneihna bial a nei lo a, hei vang hian ṭhenawm ram, Venezuela mite tlanchhiatna ramah collection centre siam a tum mek a ni.