Brazil President hlui kum 13 tang turin hrem

Brazil President hlui Luiz Inacio Lula da Silva chu eiruk thubuaiah kum 13 tang tura hrem a nih thu Nilaini khan Brazil court chuan a puang. 

Brazil chhim lama Curitiba city court chuan President hlui Silva hi construction company hnen aṭangin thingtlang lama a in chei ṭhatna tura thamna, US dollar 235,000 laa puhna thubuaia thiam loh chantirin hremna tur hi a tichhuak a ni. 

Silva chuan report hi a dik lo nia sawiin, in neitu hmingah hian a hming pawh a lang lo niin a sawi. Mahse prosecutor-te chuan he in hi Silva leh a chhungten an luah ngei a ni tih finfiahna an neihte an tilang thung. Silva thiam loh chantir a nih hma hian construction company-a top official-te leh thamna inpeknaa inhnamhnawiha puh midangte pawh thiam loh chantir an lo ni tawh bawk. 

Judge Gabriela Hardt chuan Silva in cheiṭhatna tur hi dan kalhin construction company, Odebretch leh OAS-te chuan an pe ngei tih a sawi a, president hlui pawh hian hetianga sum inpek hi thamna a ni tih a hrechiang hle a ni, a ti. Silva hi thubuai dang parukah thiam loh chantir a ni tawh bawk.