Egypt MP-ten president term tihsei chungchangah vote thlak dawn

Egypt Parliamentary committee chuan President term tihsei a nih theihna tura an ram danpui siamṭhat rawtna chu a pawm a, Parliament-ah ngaihtuahin member-te vote lak a ni ang. 

Ram danpui hman mekah President term hi kum li a ni a, danpui hi siamṭhat a nih loh chuan President term hnihna chelh mektu, Abdul Fattah al-Sisi-a term hi kum 2022-ah tawpin inthlanah a chuh nawn thei tawh dawn lo a ni. Hei vang hian sorkar chuan president term hi kum ruka pawhsei a rawt a, pawm a nih chuan Sisi hian term hnih a chuh leh thei dawn a ni. 

Parliament-a vote lak a nih a MP hmun thuma ṭhena hmun hnihten an pawm chuan, ram danpui siamṭhat tur chungchangah mipui ngaihdan lak leh a ni ang. 

Kum 2013 khan Sisi kaihhruai sipaite chuan Egypt rama democracy hmanga president atana thlan chhuah hmasa ber, Mohammed Morsi chu an paihthla a ni. Siki hi president-ah a awm zui a, nikum April thlaa inthlan buatsaihah vote tla aṭanga 97% hmuin a term hnihna turin thlan nawn leh a ni. 

Parliamentary committee chuan president term pawhsei rawtna bakah hian vice president post siam rawtna pawh a pawm bawk. 

Member 596 awmna Parliament-ah hian member tam zawk chu Sisi thlawptu an ni. Leftist MP-te chuan president term pawhsei rawtna hi thlawp lo mah se vote lak hunah a tlang ngei rin a ni.