Trump-an World Bank president tan Malpass nominate

US President Donald Trump chuan World Bank president thar thlanna turah US candidate atan US Treasury Department-a under secretary for international affairs David Malpass a thlang. 

World Bank president Jim Yong Kim a ban tak avangin a thlaktu tur hi April 12-14-a Washington-a International Monetary Fund leh World Bank-in Spring meeting an neih hma ngeia thlan fel hman tum a ni. World Bank board of executive director chuan president thar thlanna tura chuh tumte nomination chu March 14 thleng a pawmsak dawn a, hemi hnu hian hruaitu thar hi thlan a ni ang. Executive board member-te chuan candidate zinga pathum thlang chhuakin, hengte hi interview a neihpui ang. 

Trump chuan Malpass chu mi chungchuang tak, hna pawimawh tak chelh thei tur a ni tih a sawi. David Malpass hi kum 2016-a election campaign lai khan Trump-a economic adviser a ni. Kum 2017 August thla aṭang khan under secretary for international affairs  hna hi a chelh a ni. 

Kum 62 mi, Malpass hian World Bank, International Monetary Fund leh institution dangte chu midang laka inhawng lo leh inkulh bing lutuk tiin a lo sawisel fo tawh a ni. World Bank-in China hnena a sum a puktir  pawh titlem turin a lo nawr tawh a, hetiang chhawmdawlna dawng tur chuan China ram chu a hausa lutuk niin a sawi. 

Member 189 awmna, World Bank-ah hian US hi shareholder lian ber a nih avangin president atan pawh hian US nominate hi thlan tlin an la ni zel a, kum 1940 chho din a nih tirh aṭang khan president atan hian America mi hlir an la awm. Hetihlai hian ramdang economy dinhmun pawhin hma a sawn chhoh zel avangin president dinhmun chelh thei tur pawh huam zau tir zawk tura nawrna a awm mek a ni.