UK leh Canada-in Myanmar sipai hotute hrek ve leh
Myanmar-a civil sorkar paihthlatu, sipai hotute hrekna chu United Kingdom leh Canada chuan Ningani khan an siam ve leh. Kar liam ta khan US chuan Myanmar hrekna hi a lo siam tawh bawk a ni.
February 1-a sipaiten civil sorkar thuneihna hnehchhuh a, state counsellor Aung San Suu Kyi leh political leader ṭhenkhatte an man zui chu khawthlang ramte chuan na takin an dem thu an sawi. Myanmar mipuite chuan sipaite chet dan duh lohna lantirin nawrh an la huaihawt chhunzawm reng bawk.
UK chuan Myanmar sipai general pathumte chu an rama zin a khap bakah, an rama an thil neihte khawih chet theih lohin a hrek sak a, Canada chuan sipai hotu pakuate a hrek bawk. UK hian a hmain sipai hotu lu ber, Min Aung Hlaing chu Rohingya Muslim leh hnam tlem zawkte dikna chanvo palzut sakah puhin a lo hrek tawh a ni.
Myanmar sipai sorkar chuan UK leh Canada-in hrekna an siam ve leh chungchang hi a la chhang lo a, mahse Thawhlehni khan sipai thupuangtu chuan news conference a neihah ram dangten an ram hrekna an siam chu an rinlawk thu a lo sawi tawh a ni.
Ningani vek khan US secretary of state Antony Blinken chuan Myanmar ram chungchang hi India, Japan leh Australia foreign minister-te a lo sawipui tawh a, heng ramte hian Myanmar ramah a rang thei ang bera democracy sorkar a din leh thuai an duh thu an sawi.
Myanmar Assistance Association for Political Prisoners chuan Ningani thleng khan sipaite hian mi 521 man tawhin, an zinga 44 erawh chu chhuah an ni leh tawh tih a sawi. Suu Kyi-i chu dan loa ram dang aṭanga walkie talkie radio paruk laluta puhna thubuai siamsak a nih hnuin, Natural Disaster Management Law palzuta puhin thubuai dang siamsak belh leh a ni bawk a, March 1-ah court-a inlan tura tih a ni.
Nawrh huaihawt zinga mi a thi
Kar liam ta Thawhlehni, February 9-a Nay Pyi Twa-a nawrh huaihawtte hnawhdarhna atana police-ten water cannon, rubber bullet leh live round an hman ṭuma hliam tuar, kum 20 mi Mya Thwe Thwe Khaing-i chu nimin khan a hliam tuar loin a thi.
Mya Thwe Thwe Khaing hian a luah hliam na tak a tuar a, damdawi-inah dah nghal a ni. Mahse ni 10 chhung enkawl a nih hnuah a hliam tuar loin nimin khan a thi ta a ni. Right group chuan silai muin a fuh tel niin an sawi. Thuneitute chuan chhui chian a ni dawn tih an sawi ve bawk.