France-in Italy-a ambassador a ko haw

France leh Italy inkar boruak a chhe chho zel a, France chuan Ningani khan Italy-a an ram palai chu a ko haw. 

France sorkar laka lungawi lohna lantira nawrh huaihawttu, 'yellow-vest' tia kohte chu Thawhlehni khan Italy Deputy Prime Minister Luigi Di Maio chuan Paris  bulah a hmu a, hei hian France sorkar a ti thinur hle. France chuan an ram politics-a inrawlh lo turin Italy hi a vau zui nghal bawk. 

Kum 2018 June thlaa Italy-a Five Star Movement leh right-wing League party ten ṭangrual sorkar an siam aṭangin France nena a inkar boruak hi a chhe ṭan a ni. Sorkar pahnihte hi immigration chungchang bakah thil dangah pawh an inkhak fo a ni. 

Ram pahnih sorkarte inbiak lai meka Five Star Movemnet hruaitu Di Maio-an France sorkar laka lungawi lohna lantirte a hmu leh hian France sorkar a ti lungawi lo hle. Di Maio hian a twitter-ah yellow-vest hruaitu Christophe Chalencon leh member dangte nena an thlalakte a dah a ni. 

France foreign ministry chuan hun rei tak aṭang khan France chu finfiahna awm si loa dik lo taka puhchhiat a ni fo ti a sawi a, tuna Italy rawn inrawlh dan chu pawm theih a ni lo tih a sawi. Hei hi ram inṭhianṭhatna leh inzah tawnna tur palzutna a ni, a ti. 

Hetihlai hian Di Maio chuan nawrh huaihawtte a hmu chu thil dik lo a ni lo tih a sawi a, France miputie chu an ṭhianṭhate an nih thu a sawi. France President Emmanuel Macron chuan European election neih tur thlirin kawng hrang hrangin Italy sorkar chu a bei fo a, mahse hei hian ram pahnih mipuite inṭhianṭhatna chu a tichhe dawn chuang lo tih a sawi.