Bangladesh-in Myanmar ramri a khar

Bangladesh chuan Myanmar-a Rakhine state aṭang an rama raltlan an luh belh zel avangin ramri a khar. 

Kum 2017 August thlaa Myanmar sipaiten Rakhine state-a Rohingya Muslim-te laka beihpui an thlak avangin Rohingya mi nuai sarih chuang chu Bangladesh ramah hian an tlanchhe tawh a ni. 

Bangladesh Foreign Minister Ak Abdul Momen chuan Myanmar sipaite hian a tirah Rohingya-te hi bitum mah se, tunah chuan Buddhist leh Hindu helpawlte pawh an bei tel tawh tih a sawi. Myanmar aṭanga tlanlut hi an la awm reng avangin raltlan hi an lakluh belh thei tawh lo tih sawiin, ramri an khar tih a sawi.

Momen chuan Bangladesh chuan a ramri kaltlangin raltlan tam tham tak a lalut tawh a, tunah chuan ram dangten raltlante hi an lo dawnsawn ve a ngai tawh a ni, a ti.  

Nikum December thla aṭang khan Rakhine leh Chin state-ah Myanmar sipai leh Arakan Army helpawlte inbeihna avangin mi 5,000 chuang an tlanchhe tawh a ni. Myanmar hruaitute chuan Rakhine state tana thuneihna sang zawk pek phut helte chu nuaimih tumin an bei zel dawn tih an sawi. Inbeihna thleng tuartu mipuite chhawmdawlna pek turte pawh an dang a, hei vang hian civil miten harsatna nasa zawk an tawh chhoh zel a hlauhthawnawm hle.