Thailand lal farnu-in inthlanah chuh a tum

Thailand ram lal chhungkuate hi  politics lamah an inrawlh ve ngai meuh lo mah se King Maha Vajiralongkorn-a farnu, Princess Ubolratana Rajakanya Sirivadhana Barnavadi chuan March 24-a an ram prime minister thar tur thlannaah chuh a tum.

Princess Ubolratana hi King Vajiralongkorn-a u niin kum 67 mi a ni. Inthlanah hian Thailand prime minister aṭanga paihthlak tawh, Thaksin Shinawatra-a thlawptu party, Thai Raksa Chart party hmingin a chuh dawn a ni. Inthlanah hian sipai sorkara hotu, Prayuth Chan-ocha pawhin a chuh tur thu a puang tawh bawk. 

Thai Raksa Chart Party leader Preechapol Pongpanich chuan Election Commission-ah an party candidate atana princess Ubolratana an ziahluh thu a a sawi a, hriatna zau tak nei leh prime minister dinhmun pawh chelh thei tur a nih thu a sawi a, candidate atana dah an tumnaah hian dan lamah harsatna a awm loh an beisei thu sawiin, Election Commission in pawm leh pawm loh an nghak mek tih a sawi. 

Lal chhungkua lam chuan Princess Ubolratana in inthlan chuh a tum hi an pawmpui leh pawmpui loh chungchang an la tarlang lo. 

King Bhumibol-a fanu upa ber, Princess Ubolratana hi kum 1951-a piang niin, Massachusetts Institute of Technology (MIT)-ah mathematics leh bio-chemistry a zir a, Los Angeles-a University of California aṭangin public health-ah master degree a zo. Kum 1972-a  MIT-a a zirpui America mi Peter Jensen nen an inneih khan a royal title-te hlihsak a ni. Kum 26 chuang US-ah a cheng a, kum 1998 khan a pasal nen hian a inṭhen a, hemi hnu kum 2001 khan Thailand-ah awm hlen turin a kir leh a ni. Royal duty a neihte thawk chhunzawm mah se royal title erawh pek zui a ni tawh lo.  "Tunkramom Ying" tia koh a ni a, hei hi Lalnu fanu tihnaa ni a, mahse lal chhungkaw zinga mi a nih avangin official angin a awm zui tho a ni.