Israel PM-in Palestinian fund titawpah vau

Israel Prime Minister Benjamin Netanyahu chuan Pathianni khan Palestinian National Authority (PNA) tana Israel in pawisa a pek ṭhin ṭhenkhat chu titawpah a vau. 

Israel hian Palestinian ram a luah, West Bank leh Gaza Strip-a Israel port kaltlanga bungrua thawn luhah chhiah a la ṭhin a, henga a chhiah lakkhawmte hi PNA fund atan a thawn leh ṭhin. Thla khat chhunga chhiah a lakkhawm hi US dollar maktaduai 127-te a tling ṭhin a ni. 

Nikum khan Israel Par-liament, Knesset chuan dan thar siamin, he dan  hnuaiah hian Israel sorkar chuan PNA fund ṭhenkhatte hi a lo tihkhawtlai sak thei a ni. PNA hian sum a dawnte hi Israel mite beih vanga Israel ram jail-a tang mek chhungte hnenah a lo pek ṭhin avangin he dan hi siam a ni. 

Pathianni-a weekly cabinet meeting neihah PM Netanyahu chuan kar tawp lamah sum hreksakna tura tihngaite chu tihfel hman tum a nih thu sawiin, Pathianni lo awm turah hian security cabinet meeting koin an pawmpui dawn tih a sawi. 

Kar kalta khan Israel mi, Ori Ansbacher-a thata puhin Palestinian mi pakhat chu man a ni a, hei vang hian PNA fund hreksakna tur dan hi hmang turin right-wing lam chuan PM Netanuyahu hi an nawr a, a nawrtu zinga hian Education Minister Naftali Bennett pawh a tel. 

Israel sipaite chuan Ansbacher thattua puh, Palestinian mi Arafat Irfaiya chenna in, Herbon ami chu ṭhiahsak an tum thu a sawi. Pathianni zan khan sipaite chu Hebron-ah hian an lut tawh a, tualthattua puh chenna in pawh an enfiah mek niin an sawi. Ansbacher-i ruang hi kar kalta Ningani tlai khan Jerusalem chhimchhak lamah hnmuh a ni a, a tukah Tekoa-ah vui a ni. Tualthattu nia rinhlelh hi man ni tawh mah se thubuai erawh siamsak a la ni lo.