Thailand Princess nominate tu party ṭhiat turin ngen dawn

Thailand ram inthlanpui neih tura prime minister atana Thailand lal fanu, Princess Ubolratana Rajakanya Sirivadhana Barnavadi nominate tu Thai Raksa Chart party chu ṭhiat turin Election Commission-ah ngen tum a ni. 

Thailand lal, King  Maha Vajiralongkorn chuan a farnu-in inthlan chuh a tum ve hi a thlawp loh thu a lo sawi tawh a, lal chhungkaw member tan politics khelh chu thil tihawm lo tak a nih thu a sawi. Thailand lal chhungkua hi an ram politics-ah an inrawlh ve ngai lo a, electoral law chuan lal chhungkuate chu campaign-na atana political party-ten an hman a khap bawk. 

Association for the Protection of the Constitution secretary-general, Srisuwan Janya chuan Pathianni khan King Vajiralongkorn-a thusawi aṭang hian Thai Raksa Chart party-in candidate atana Princess Ubolratana an nominate hian electoral law a palzut tih chiang takin a tilang tih sawiin, hei vang hian Election Commission hnenah complaint thehlutin, Constitution Court hnenah an party ṭhiat tura ngen turin a ti dawn tih a sawi. 

Thai Raksa Charts executive chairman Chaturon Chaisaeng chuan an party chuan an ram lal thuchah chu an pawm thu sawiin, an ram harsatna chingfel turin hma lam an pan zel tur thu a sawi.