Myanmar police-te silai hmehpuahah Nawrh huaihawt zinga pahnih an thi

Myanmar sipaiten civil sorkar thuneihna an hnehchhuh duh lohna lantirin mipuiten nawrh an la huaihawt chhunzawm zel. Mandalay-a nawrh huaihawtte hnawhdarhna atana police-ten silai an hmehpuahah pungkhawm zinga mi pahnih an thi a, mi dang 20 velin hliam an tuar. 

Nimin khan Mandalay-ah shipyard-ah mi tam tak pung­khawmin, sipaiten thuneihna an chhuh hnua an man, National League for Democracy (NLD) party hotu Aung San Suu Kyi leh hruaitu dangte chhuah turin an phut. Police-te chuan pungkhawmte hi hnawhdarh an tum a, an innawr buai zui a ni. Pungkhawm zinga ṭhenkhat hian police-te hmanraw ṭhenkhatin an vawm a, hei vang hian police lam chuan tear gas-a phuhin, silai pawh an hmetpuak zui ta nia sawi a ni. Police-te silaiin a fuh avanga thi pahnihte hi kum 36, a awma kah fuh leh kum 18 mi, a lu-a fuhte an ni. Kar liam ta Zirtawpni khan Nay Pyi Taw-a nawrh huaihawtnaa police-te hmanraw hman avanga hliam tuar, kum 20 mi Mya Thwe Thwe Khaing chu a lo thi tawh bawk. 

European Union chuan he thil thleng hi na taka a dem thu a sawi nghal a, UK foreign secretary Domi­nic Raab pawhin pungkhawmte silaia kah an nih chu a dem takzet tih sawiin, an thawhpui ram dangte nena Myanmar sipaite na zawka hrek an nih dan tur hi an la ngaihtuah thuai dawn tih a sawi. 

Nimin khan Mandalay bakah khawpui hrang hrangah nawrh hi huaihawt chhunzawm a ni a, Myanmar rama khawpui lian ber, Yangon-ah pawh hmun hnihah sipaite chet dan duh lohna lantirin ṭhalai tam tak an pungkhawm. Monywa, Bagan, Dawi leh Meyik-ah pawh mipuiten kawng an zawh bawk.