US border security chungchangah inremna siam
US-a Democrats leh Republican-te chuan US sorkarin border security a kalpuina tura sum pek tur chungchangah a thuphungin inremna an siam thei tawh a, mahse hei hi Congress-in a pawmpui a, President-in a hming a sign hnan leh phawt a ngai ang.
He inremna hi pawm a nih chuan sorkar shutdown ngai leh tur pawh a dan theih phah dawn a ni. Mahse inremna an siamah hian President Donald Trump-an ramri hungna bang siamna tura a sum phut ang zat erawh an pawm tello a, concrete hmanga bang siam tum a nih chungchang pawh sawilan tel a ni lo bawk. Inremna siamah hian steel hmanga ramri, km 88-a thui hungna siamna tur dollar tluklehdingawn 1.375 chauh pawm tel a la ni rih.
President Trump chuan inremna siam hi a pawm dawn leh dawn loh a la sawi chiang lo a, hemi rual hian eng kawng pawhin ramri hungna bang chu an siam dawn tho tih a sawi nawn leh.
House of Representative thu-nuntu, Democrats lam chuan President Trump-an ramri hungna siamna tura a sum phut, dollar tluklehdingawn 5.7 chu an la pawmpui thei lo a ni.
Federal agency ṭhenkhatte chu an fund a zawh dawn hnaih avangin he bill hi Zirtawpni-ah pawm hman ngei a ngai dawn a ni. Pawm a nih loh chuan agency ṭhenkhat chu hnathawk chhunzawm thei loin khar, shutdown an ngai leh dawn a ni. Border security fund chungchanga inremna an siam theih loh avangin sorkar hi ni 35 chhung shutdown a lo ni tawh a, hei hi US chanchina sorkar shutdown a nih rei ber ṭum niin, hemi chhung hian dollar tluklehdingawn 11 zet an hloh hman a ni.