Brexit deal siam loh chuan mi nuai rukin hna an chan thei dawn

European Union aṭanga Britain inlakchhuahna turah inremna mumal tak siam a nih loh chuan ram hrang hrangah mi nuai ruk chuangin an hna an chan phah thei dawn a, Germany chu a tuar nasa ber a ni dawn nia sawi a ni. 

Eastern Germany-a Halle-a IWH institute-in zirchianna a neihah, EU aṭanga a chhuah hnuah UK-in EU ram dang aṭanga a thil lakluh a tihtlem chuan mi tam tak a nghawng dawn tih a sawi. Europe-a economy lian ber ram, Germany chuan tuar nasa berin mi 103,000 velin an hna an chan phah thei dawn a, France-ah mi 50,000 velin an chan dawn bawk niin a tarlang. 

March 29-ah Britain hian EU chhuahsan a tum a, hemi atana Britain PM Therera May-i leh EU hruaituten inremna an siam, Withdrawal Agreement chu an ram tana ṭha tawk lo nia sawiin Britain PM ten Parliament-ah an hnawlsak a ni. Withdrawal Agreement an siam hnuaiah hian Britain chuan EU a chhuahsan hnuah EU rules-in a la phuar chhunzawm reng dawn nia sawiin an duh lo a ni May-i hian Brexit deal chungchang hi EU hruaitute sawipui 

ṭha leh tura hun pe turin a ngen a, House-ah pharh leh a, February 14-ah vote lak leh tum a ni. Thawhṭanni khan May-i Brexit minister Stephen Barclay chuan EU negotiator Michel Barnier a hmu a, tunkar chhung hian foreign minister Jeremy Hunt chuan Paris leh Warsaw a tlawh bawk ang. Britain PM hian tun thla chhungin European Commission chief Jean-Claude Juncker a hmu dawn bawk a ni.