IMF hotuin Pakistan puih inhuam

International Monetary Fund (IMF) hotu Christine Lagarde chuan Pakistan Prime Minister Imran Khan nena an inkawm hnuah Pakistan-in sum lama a harsatna pui turin IMF chu a inhuam thu a sawi. 

Pathianni khan Lagarde leh Imran Khan te hi Dubai-a World Goverment Summit neih karlakah an inkawm a ni. Pakistan PM hian an ramin leiba a ngah avanga sum lama harsatna an tawh mek chungchangte thlenin, ṭanpui turin IMF hotu hi a ngen a ni. 

Nikum November thla khan IMF team chuan Pakistan hi an lo tlawh tawh a, Pakistan official-te chu leiba tam tak an neih mek laka khaichhuah an nih theih dante an sawipui a ni. Mahse inremna an la siam thei lo a, inbiakna an la neih chhunzawm mek a ni. 

Pakistan hian kum 1980 chho aṭang khan IMF hnen aṭang hian sum a lo puk fo tawh a, kum 2013 khan sum lama an harsatna tawhte sutkianna turin dollar tluklehdingawn 6.6 a lo puk tawh bawk.