US-in Venezuela oil leisak lo turin ramdangte vau

US National Security Advisor John Bolton chuan ram dangte leh company-te chu Veneuzela crude oil leisak lo turin a vau.

John Bolton chuan Venezuela President Nicolas Maduro-an an hausakna, oil a rukte lo leisaktu ram leh company-te chu an theihnghilh mai dawn lo tih a sawi. US chuan a theih  ang angin Venezuela mipuite thil neih chu humhalh sak a tum nia sawiin, ram dangte pawh hetianga ti tura a duh thu leh an thawhho a ngaih thu a sawi.

Venezuela Oil Minister Manuel Quevedo-an India ramah oil tam zawk hralh an tum thu a sawi hnuah Bolton hian he thu hi a sawichhuak ve nghal a ni. US President Donald Trump-a kaihhruai sorkar leh a thawhpui ramte chuan Venezuela eptu hruaitu leh National Assembly President Juan Guaido chu Venezuela acting president atan an pawm a, Maduro chu bang turin an nawr a ni.