Philippines journalist bail-in chhuahtir

Award-winning Philippines journalist, Maria Ressa-i chu President Rodrigo Duterte sawiselna lam thu a post avanga man a nih hnuin nimin khan bail-a chhuahtir a ni. 

Kum 55 mi, Rappler website editor Ressa-i hian Nilaini khan President Duterte leh a kaihhruai sorkarin an rama ruihhlo zuarte laka beihpui an thlaknaa mi sang tel thah an nih chungchang sawiselna thu a post a, hei vang hian Nilaini zan khan man a ni. Manila-a National Bureau of Investigation detention-ah hren a ni a, mahse nimin khan bail-a chhuah leh nghal a ni. Ressa-i hi thu dik tawk lo auchhuaha puhin thubuai siamsak a ni a, a thubuaiah hian thiam loh chantir a nih chuan kum 12 thleng tantir theih a ni ang. Hei bakah hian chhiah awlru leh foreign ownership law palzutah puh a ni bawk. A thubuai hi March 1-ah ngaihtuah leh a ni ang. 

Kum 2018-a Time Magazine Person of the Year atana thlan, Ressa-i man a ni hi eptu pawl, Amnest International leh International Press Institute (IPI) chuan an dem thu an sawi a, Philippines sorkarin an rama eirukna leh human rights palzutna thleng chungchang chhuitu news organisation-te awpbeh a tumna niin an puh a ni.

Ressa-i laka thubuai siamsak a ni chu thil zahthlak tak leh press freedom palzutna a nih thu an sawi bawk a, thubuai siamsak chu sut turin an phut a ni. 

Hetihlai hian sorkar chuan Ressa-i manna hi press freedom nena inkungkaihna a nei lo tih a sawi a, President thupuangtu Salvador Panelo chuan a wesbite-a thu post chu thu dik lo a nih thu a sawi.