Thai Princess-in harsatna a thlen vangin pawi a ti

Thailand Princess Ubolratana Rajakanya Sirivadhana Barnavadi-i chuan an ram inthlanpui neih tura chuh a tum ve avanga harsatna a thlen chu pawi a tih thu 

a sawi. 

Thai Raksa Chart Party chuan inthlanpui neih tura an party prime minister candidate atan Princess Ubolratana hi an nominate a ni. Mahse Thailand lal, King Maha Vajiralongkorn chuan lal chhungkaw member zinga miin politics luhchilh a tum hi thil awmlo tak a nih thu leh, a duh loh thu a sawi a, hemi hnu hian Thailand Election Commission pawhin Princess hi prime minister candidate a nihna aṭangin an hnawl zui bawk. 

Princess Ubolratana chuan a Instagram-ah thupha chawina hi post-in, ram tana thawh a tum vena avanga an ram leh Thai mipuite tana harsatna a thlen avangin pawi a ti hle tih a sawi a ni. Hetianga harsatna hi tun ang hunah chuan thleng tawh lo tur nia a ngaih thu a sawilang bawk a ni. PM atana Princess Ubolratana nominate tu, Thai Raksa Chart party hi Thailand prime minister aṭanga paihthlak tawh, Thaksin Shinwatra thlawptu a ni. Thaksin leh a thawhpuite hian kum 2001 aṭang khan inthlanah hnehna an la chang ziah a, mahse court thuneihna emaw, sipai chakna hmang emawin an sorkar hi paihthlak sak an ni zel a ni. 

Thai Raksa Chart party hi lal chhungkaw member politics khel tura hnuklut a, PM candidate atana an ruat avangin electoral law palzutah puh a ni a, hei vang hian Election Commission-ah an party hi ṭhiat tura ngenna thehluh a ni. EC Secretary General Charungwit Phumma chuan he ngenna hi Constitutional Court-a ngaihtuah tura an thawn thu a sawi a, court hian party ṭhiah a nih dawn leh dawn loh hi a ngaihtuah dawn a ni.