Trump-an sorkar khar venna turin bill sign dawn Border wall siam nan national emergency puan tho tum

US President Donald Trump chuan sorkar khar a ngaih tawh lohna turin government funding bill a sign dawn a, hemi rual hian a hmaa a lo sawi tawh angin ramri hungna bang siamna tur fund hmuh a nih theih nan national emergency puan a tum tho tih a sawi. 

White House Press Secretary Sarah Sanders chuan President hian an ram himna tura ramri venhimna ṭha zawk siam a, a hungna bang siam a lo tiam tawh chu tihpuitlin ngei a tum a ni, a ti. 

Senate Majority Leader Mitch McConnell pawhin Ningani khan President Trump-a thil tum hi Senate-ah a puang a, hemi hnu hian sorkar shutdown pumpelh a nih theihna tur, spending leh border security bill-ah vote lak niin, a thlawp lamah vote 82 tlain a duh lo lamah vote 16 a tla thung. Ningani zan khan House of Representative-ah pawm zui a ni ve leh a ni. House-ah hian member 300 in thlawpin, a thlawp lo lamah vote 128 a tla a ni.

He bill hi Congress leh President Trump-an an pawmpui chuan nizan zanlai aṭanga fund indaih loh avanga sorkar department khar ngaih phah tur chu a veng thei dawn a ni. Security bill-ah hian US-Mexico ramri hunga tur senso US dollar tluklehdingawn 1.375 telh a ni. 

President Trump hian ramri hungna bang siamna tur hian dollar tluklehdingawn 5.7 a dil a ni. A sum phut ang pek a nih dawn loh vang hian Trump chuan national emergency puan a tum a, hei hi a puang a nih chuan ramri bang siamna tur sum hi hmun dang aṭangin a dil thei dawn a, hei bakah sipaite chu ramri hungna siam tur hian a chhawr thei dawn bawk a ni.

Hetihlai hian House of Representative Speaker, Democrat Nancy Pelosi chuan President-in emergency puan a tum chu a thlawp lo thu a sawi a, ramri hungna siam tum chu emergency puan phahna khawp tur a tling lo tih a sawi.