Myanmar-in Bangladesh Camp-ah palai tir dawn

Myanmar sorkar chuan Bangladesh-a Rohingya Camp-a awmte chu an rama kir leh tura sawm turin high-level team a tir dawn tih UN-a Myanmar ambassador chuan a sawi. 

Kum 2017-a Myanmar sipaiten Rakhine state-a beihpui an thlak avang khan Rohingya Muslim mi 7,40,000 vel chu Bang­ladesh ramah an tlanchhia a, raltlante hi  Cox'z Bazar-a camp siamah an khawsa mek a ni. 

United Nations chuan Myanmar sipaite chetdan chu Rohingya Muslim-te thenfai tumna niin a sawi a, mahse Myanmar sipaite chuan hei hi chhangin, kum 2017 August thlaa border post beitu Rohingya helpawl dapchhuahna tura ti an nih thu an sawi thung. 

UN-a Myanmar ambassador Hau Do Suan chuan General Assembly meeting neihnaah Myanmar sorkarin Cox's Bazar-ah high-level team a tirh thuai tur thu a sawi a, July thla chhungin an kal hman dawn tih a sawi. High-level team hian camp-a awm raltlante chu Myanmar rama an kir leh theih dan tur leh, an awmna tur buatsaih a nih dan turte an sawipui ang a; kir leh ngei tura hmin an tum dawn tih a sawi. 

Suan chuan Rohingya raltlan 30,000 velin Myanmar rama kir an dil tawh thu a sawi a, heng mite nihna pawh hi finfiah vek tawh a ni a; an zinga 13,200 chu Rakhine state-a lo khawsa tawh ṭhin an ni ngei tih finfiah a ni a, an duh hun hunah Rakhine lamah hian an let thei a ni, a ti. 

Hetihlai hian UN chuan raltlante harsatna chinfel sakna kawngah Myanmar chu che muangah a puh fo. An buaina chinfelna atan chuan an kir leh ngamna tura boruak ṭha leh him siamsak te, zahawm taka lo dawnsawnte a ṭul tih a sawi. 

Hemi rual hian Rakhine state-a Myanmar sipai leh Arakan Army (AA) helpawl inbeihna thleng pawh tihtawp vat a ṭul tih a sawi bawk.