Pakistan President hlui man nawn leh

Pakistan anti-corruption body chuan Thawhṭanni khan an ram President hlui Asif Ali Zardari chu corruption case dang vangin an man nawn leh.

President hlui Zardari hi a farnu Faryal Talpur nen multi-million dollar money laundering case vangin National Accountability Bureau (NAB) custody-ah July 2 thleng awm tura tih a lo ni tawh bawk. NAB chuan an unau hian bank account lem hmangin cheng maktaduai 150 an thawn kual tih a sawi. 

NAB investigator-te chuan Zardari hren theih hun hi a tawp tawh a, court-in a pawhsei sak bawk si loh avangin London-a dan kalha a ram neih nia sawi, Park Lane case  kaihhnawiha manna thupek siam chu Zardari hren zui zel nan hian an hmang ta nia sawi a ni. 

Zardari hi Islambad High Court-a bail a dilna chu a hnuhdawh hnuah man zui nghal a ni. Zardari chuan bail-a chhuahtir a nih chuan NAB hian a lakah dik lo takin thubuai a siam belh zel dawn nia sawiin, a dilna pawh hi a hnukdawk leh zawk tih a sawi. 

Kum 2008-2013 chhunga Pakistan president dinhmun chelhtu, Zardari hian account lem siama puhnaah hian inhnamhnawihna a neih loh thu a sawi. Hei hi Pakistan-a rorellai, Pakistan Tehreek-e-Insaf party-in eptu pawl hruaitute tihchhiat tuma an beihna hmanruaah a puh a ni.