Libya-a migrant detention centre beih a ni

Libya khawpui Tripoli daia pemlutte awmna, detention centre chu thlawhtheihna aṭangin beih a ni a, mi 40 an thi a, midang 80 in hliam an tuar bawk. Thi zinga a tam ber hi Africa aṭanga pem lutte nia sawi an ni. 

Detention centre hi raltlan leh pemlutte chenna hmun a ni. Centre hi sipai camp bulhnaia awm a ni a, centre-a awmte hi a tam zawk chu Africa ram atang lut an ni. Libya ram atanga clandestine sea kaltlanga Europe ram a luh tumte an awm tlangpui. 

UN thlawp, Libya Prime Minister Fayez al-Serra kaihhruai Government of National Accord (GNA) chuan Tripoli khaw daia detention camp beitu hi self-styled Libyan National Army (LNA) niin a puh. Thuchhuah siamin, GNA chuan camp beih a ni chu pawikhawihna tenawm tak a nih thu a tarlang. 

Khalifa Haftar-a kaihhruai LNA chuan detention camp beitu an ni lo tih a sawi thung. Tripoli east hi Haftar-a thununna hnuaiah a awm a,Tripoli mai bakah an ram Libya-ah lalna leh rorelna chan hi a tum a ni. France, Egypt leh UAE-ten an thlawp bawk.

UN refugee agency chuan migrant centre beih a ni chu a dem thu a sawi a, pawikhawihna thlenna hmuna kal Doctor Khalid Bin Attia chuan camp chu a chhe hneh hle a, mi tam tak lungngaiin an awm a, an dinhmun chu a rapthlak hle a ni, a ti. 

Dinhmun ṭha zawk beiseia Africa aṭanga Europe a pem tuma kal mi tam tak chu Libya sorkarin a siam detention-ah hian an awm tir ṭhin. Centre-te hi an ṭhat tawk loh avangin human rights group-te chuan an sawisel fo a ni.