Intenational Monetary Fund-in Pakistan tana Loan USD tld. 6 pekna tur pawm

Intenational Mone­tary Fund (IMF) chuan sum lama harsatna tawk mek, Pakistan hnena kum thum chhunga US dollar tluklehdingawn ruk loan pekna tur chu a pawmsak ta. 

Pakistan hian kum 2018 August thla khan leiba ngah avanga har­satna an tawh mek laka khaichhuah dan ngaihtuah sak turin IMF hi a lo ngen tawh a ni. IMF thupuangtu Gerry Rice chuan, IMF Exeuctive Board-in Pakistan ram economy siamṭhatna leh, mipuite nunphung khawsak tih changkan a nih theihna turin loan pek a remtih thu a sawi. Loan USD tld. ruk pek tur aṭang hian tld. khat chu pekchhuak nghal a ni ang a, a bak chu a tahtawla pek chhunzawm a ni ang. 

Pakistan hian IMF nena hun rei tak inbiakna an neih hnuah an leiba aṭanga  khaichhuahna tura IMF ruahmanna siam hi thla hmasa khan a remtihpui thei chauh a ni. IMF chuan loan hi Pakistan economic reform programme puihna atana pek a remti a, he programme hnuaia ruahmanna siamah hian public finance tih­chang­tlun a, sorkarin chhiah lak dan a siamṭhat hmanga an leiba neihte rulh chhohna turte a tel.