Bangladesh PM thah tumtu mi pakua thi tura hremna pe

Bangladesh court chuan kum 25 liam taa an ram Prime Minister Sheikh Hasina thah tuma beitu mi pakua-te chu thi turin hremna a pe a, midang 25-te chu damchhung tang tur leh midang 10-te chu kum 10 tang turin a hrem bawk.

Kum 1994-a Hasina chuanna rel beih a nih ṭum khan Hasina hi a party, Bangladesh Nationalist Party (BNP) chu eptu lama an awm lai a ni a, politics lama a khingpui ber Khaleda Zia prime minister a nih lai a ni. Prosecutor Aminul Islam chuan pawikhawihtute hian Hasina chuanna rel-ah hian bomb an vawm a, an kap zui bawk tih a sawi. Hetihlai hian Hasina hi thuneihna a chan leh hnuah amah sawiseltute leh a laka helte chu rahbeh tumin a bei zui nia puh a ni ve thung a, mi eng emaw zat jail-ah khung tawhin an zingah hian BNP mi leh sate pawh an tel nia sawi a ni. PM hlui Khaleda Zia pawh eiruk thubuai siamsakin, jail-ah khung mek a ni bawk. Zia chuan thubuai siamsak a nih danah politics a inrawlh a ni, tiin a puh ve thung. 

Hasina hi kum 2004 khan Dhaka-a rally a neihnaah thah tuma beih alo ni tawh bawk. Rally-na hmunah hian grenade tihpuah a ni a, mi 24 an thi a, midang 50 chuangin hliam an tuar. He pawikhawihna thleng kaihhnawihah hian kum 2018 khan court chuan mi 19 chu thi tura hremna pein, midang 19 chu damchhung tang turin a lo hrem tawh bawk a ni.