Sudan-a nawrh huaihawtte leh TMC-ten inbiakna chhunzawm

Sudan-a civil sorkar din phuta nawrh huaihawtte leh sorkarna chelh mektu, Transitional Military Council (TMC) chuan inbiakna an neih chhunzawm leh ta. 

Sudan sorkar chu April 11 khan sipai chakna hmanga paihthlak a ni a, thuneihna chu TMC kut­ah a awm zui a ni. Sudanese Pro­fessionals Asso­ciation (SPA) kaihhruaina hnuai­ah civil sorkar din ngiatin nawrh huaihawt a ni ṭhin a, sorkarna siam mek tu TMC  nen inbiakna an neih fo hnuah pawh inremna tluantling an nei thei lo, May thla aṭang khan inbiakna hi an ti tawp tawh a ni. 

African Union leh Ethiopian remna palaite nawrna avangin Nilaini khan nawrh huaihawttute leh sipai hotute chuan sorkar thar ruangam tur chungchangah hmai chhana inbiakna an nei. Nawrh huaihawttu lam hian sorkar hnenah phut eng emaw zat an nei a; nawrh huaihawt avanga an mi man te chhuah tur leh June 3-a Sudan khawpui Khartoum-a nawrhna lantirtu mi tam tak kahhlum chungchang chhuichiang tu tur International committee din leh thildang te a tel.

United Nations human rights chief, Michelle Bachelet chuan sipai hotute chu internet khuah­khirhna hlip tur leh sipaiten ralthuam leh tharum thawhna an nei ṭhin nia sawite khap turin a ti. Sudan ramah hian khawpui lian tak tak 10 chuangah nawrhna hi a nasa hle a, sipaite pawhin nawrh huaihawttute hnawhdarh nan ralthuam hmang nasain, tharum an thawh nasa bawk a, mi100 chuang in nunna an chan tawh a ni.