Khawvel pumah Covid-19 vanga thi 3,000 chuang tawh

Covid-19 vanga thi chu nimin thleng khan khawvel ram hrang hrangah mi 3,000 an chuang tawh a, he hri hi ram hrang hrangah a darh belh mek bawk. Hri leng vanga thi zinga 2,912 chu China ram chhunga mi an ni. China bakah ram dang 10-ah he hri thihpui hi an awm tawh. Ram hrang hrangah  hri kai finfiah tawh mi 90,000 an chuang tawh.

China ramah chuan hri kai thar hi an tlahniam hle a, hri darh ṭanna Hubei province pawn lamah chuan nimin khan a kai thar hi mi paruk chiah an awm. Nimin khan China-ah chuan Covid-19 vanga thi hi mi 42 an awm a, heng mite hi Hubei province chhunga mi vek an ni. 

Indonesia ramah chuan nimin khan Covid-19 kai mi pahnih hmuhchhuah thar an nih thu sawiin, Iran-ah chuan he hri leng vang hian mi 11 thihbelh lehin, mi 54 in an thihpui tawh a, China tih lohah hri leng vangin thi tamna ber ram a ni. 

Europe rama hri darh nasat berna ram, Italy-ah chuan Covid-19  kai hi mi 1,694 an tling tawh a, France ramah pawh a kai hi pun belh zelin mi 130 an tling tawh bawk. UK-ah pawh hri kai hi 36 an awm tawh a, nimin khan prime minister Boris Johnson chuan an rama hri leng mek chungchang ngaihtuah tur hian emergencyuCobra committee a ko. Czech Republic, Scotland leh Dominican Republic ramahte Covid-19 kai hi hmuhchhuah thar an ni. 

Worth Health Organisation (WHO) chuan hri leng mek hi ram  60 chuangah a darh tawh tih sawiin, a darh chak dan chu 'very high' level ah a dah tawh bawk. Hemi rual hian hri kai tam zawkte chu an dinhmun a ngaihtuahawm lo tih a sawi a, Covid-19 kai thi zat chu 2%-5% inkar an ni tih a sawi.