Sudan military council leh eptuten inremna siam

Sudan-a rorellai, Transitional Military Council (TMC) leh civil sorkar din phuta nawrh huaihawtte chuan inthlan neih a nih hmaa thuneihna inṭawm siam dan turah nimin khan inremna an siam thei ta. 

Pawl pahnihte hian joint military-civilian sovereign council siam an remti a, hemi hmang hian thuneihna inchelh chhawkin kum thum chhung vel chu ro an rel dawn a ni, tiin an inkara palai hna thawktu African Union (AU) mediator Mohamed Hassan Lebatt chuan a sawi.

Inremna an siamah hian sipai leh civil lam hian seat nga ve ve an chang dawn a, seat khat dang chu pawl pahnihten an remtih angin civilian lamin an chang bawk ang. Transitional Military Council leh civilian hruaitute chuan June 3-a democracy thlawp­tuten nawrh an huai­hawt­na sipaiten an beih avanga mi eng emaw zat an thih chung­chang pawh langtlang taka chhui chian an remti bawk. 

TMC deputy head General Mohamed Hamdan Dagalo chuan inremna an siam thei ta chu lawmawm a tih thu sawiin, an inremna chu rintlak a nih thu a sawi. Eptu pawl aiawh, Forces of Freedom and Change (FFC) hruaitu Omar al-Degair pawhin inremna an siam chuan thuneihna inhlanchhawnna tur kawng a hawng dawn tih sawiin; hei hi an ram tana hunbi thar inṭanna tur a nih ngei a beisei thu a sawi.