California chhim lamah magnitude 6.4 a nain lir a nghing
US-a California state chhim lamah Ningani khan magnitude 6.4 a nain lir a nghing a, kum-20 chhunga California-a lirnghing nat ber ṭum a thleng.
Lir nghinna hmun hi Los Angeles aṭanga km. 272 vela hla Searles Valley a ni a, a inṭanna chu leihnuai km. 8.68-a thuk, north latitude degree 35.70 leh west longitude 117.51 degree a ni. Lirnghing hian hmun tam takah thil a tichhia a, hriat theih chinah thi an awm lo a mi eng emaw zat in hliam an tuar.
USGS Seismologist, Robert Graves chuan magnitude 2.5 leh a chunglam a nain aftershocks ṭum 159 vel a thleng tawh tih a sawi. Seismologist Dr. Lucy Jones, California Institute of Technology (CalTech)- a mi chuan lir nghin leh theihna chance zaa 50 ala awm tih a sawi. Lirnging hi a na hle a - Las Vegas, Phoenix, Reno, Chico, Calif leh Mexico hmun ṭhenkhat Ensenada leh Mexicali a ṭangte pawhin a hriat theih a ni. Kum 1999 khan magnitude 7.1 a nain California a Mojave Desert chu lirnghingin alo sawi tawh a, chhiatna nasa tak thlenin hliam tam tak an awm a, nunna chan erawh an awm lo a ni.