Europe-ah dan loa pem raltlan mi 80,000 chuang awm

Turkey communication director Fahrettin Altun chuan an ram chhimtlang lam ramri aṭanga Europe-a dan loa raltlan pem lut mi 80,000 chuang an awm thu a tarlang.

Europe-ah hian Turkey chhimtlang lama awm, Edirne province aṭangin Evros lui kaltlangin pem lut hi an awm ṭhin. Heng pem lutte hi Syria, Iraq, Iran leh Pakistan aṭanga kalte an ni tlangpui a, an pem luh chhan ber chu nun nuam zawk an beisei avang leh an ram a ralmuan tawk loh vang a ni ber.

Edirne province-a Turkey mi sangha manna lawng neitute chuan heng raltlante hi lui aṭangin an khawmualah an phur phei ṭhin a, mi pakhat phurh  manah hian US dollar 35-70 te an la ṭhin a ni. Lawnga lui kan ve lote hian lui an hel chhung hi kilometre 1.5 tal an kal a ngai ṭhin bawk. Heng lui kan tute hi Greece security force chuan an lo man chang a awm fo a, an man tak te hi Turkey-ah an thawn kir leh ṭhin. Dan loa raltlante dan an nih theih nan security force-te hian lui kamah hian barbed wire an dah nual bawk. Turkey-ah hian Syria raltlan maktaduai 1.5 vel an awm mek a, Syria aṭanga raltlan  luh belh tur hi Turkey thuneitute chuan an khap lailawk rih a ni.