Facebook-in Myanmar sipai FB page a paihsak
Facebook chuan Pathianni khan Myanmar sipaite main page a paihsak.
February 1-a Myanmar sipaiten an rama civil sorkar thuneihna an hnehchhuh leh, political leader eng emaw zat an man avanga lungawi lohna lantira pungkhawmte laka police-te silai hmehpuah avangin Inrinni liam ta khan mi pahnih an thi leh a, hemi hnu hian Facebook chuan Myanmar sipai, Tatamdaw main page chu a paihsak a ni.
Thuchhuah siamin Facebook chuan, "Kan global policy zulzuiin spaite hian kan community standard an palzut fo avangin Tatamadaw True News Information Team Page chu Facebook aṭangin kan paihsak ta a ni," a ti.
Facebook hian kum 2018 khan tuna Myanmar sipai hotu lu ber ni ta, Min Aung Hlaing leh sipai senior officer 19 bakah sipai member-te enkawl page leh account tam tak a lo tihtawp sak tawh bawk.
Nawrh chhunzawm zel
Sipaiten sorkar thuneihna an chhuhsak aṭanga kar thum hnuah pawh nitin mipuiten lungawi lohna an la lantir chhunzawm zel.
Nimin khan an ram chhunga khawpui hrang hrangah sipaite chet dan duh lohna lantirin mipui an punghkawm leh. Police-te chuan an ram khawpui, Nay Pyi Taw-a mipui pungkhawmte hnawhdarh tumin water cannon leh motor tam tham tak an inchhawp.
Nawrh huaihawtte hnawhdarhna atana police-te silai hmehpuahin a fuh avangin mi pathum an thi tawh a ni.