US-ah Covid-19 vanga thi mi nuai 5 dawn ni tawh

Khawvela hripui leng mek, Covid-19 hri leng tuar nasa ber ram, US-ah chuan he hripui vanga thi hi mi nuai nga dawn an ni tawh. 

US-a Covid-19 thihpui hmasa ber chu nikum February thla tir lam khan a thi a, California-a Satna Clara County ami a ni. Hemi aṭanga thla li hnuah hripui vanga thi hi mi 1,00,000 an tling a, September thla khan 200,000 awmin, December thlaah mi 3,00,000 in an thihpui hman. Thla khat a liam leh hnu, kumin January 19 khan  Covid-19 vanga thi hi 4,00,000 an tling chho  a, Pathianni thleng khan he hrihpui thihpui zat hi 4,98,897 an tling hman a ni. 

Covid-19 vanga thi hi kum 2019-a ram puma lower respiratory diseases, stroke, Alzheimer, flu leh pneumonia vanga thi belhkhawm aiin an tam tawh zawk. Kum 1918-a influenza  hripui a leh hnuah, hri leng vanga thi an tam lehna ber a ni bawk. 

University of Washington chuan an rama hri leng dinhmun thlirin, kumin June 1-ah chuan hripui vanga thi hi mi 5,89,000 an tling thei dawn niin a chhut. Hetih lai hian John Hopkins University expert-te chuan April thlaah chuan hri leng zualpui hi a reh tawh ang a, nunphung pawh a pangngai chho tawh dawn nia an rin thu an sawi thung. 

Worldometers-in a tarlan danin nimin thleng khan khawvel pumah Covid-19  kai hmuhchhuah hi mi 11,19,88,092 an awm tawh a, hripui vanga thi hi mi 24,78,752 an tling tawh bawk. US, India, Brazil, Russia, UK, France, Spain, Italy, Turkey leh Germany-te chu hri kai tam zualna ram 10 an ni a, US dawtah Brazil chu Covid-19 vanga thi tamna ram niin, India-in a dawt a ni.