SKorea doctor-ten nawrh huaihawtah vau

South Korea doctor-te chuan sorkarin doctor jail tangte licence tihtawp sakna tur dan siama tum chu duh loin, he dan hi pass a nih chuan nawrh huaihawtah an vau. 

Doctor-ten nawrh an huaihawt chuan tun kar aṭanga coronavirus vaccine pek chhuah tum chu a bahlah phah hlauh­thawnna a lian nghal hle. Tunkar Zirtawpni aṭang hian South Korea-a healthcare worker-te chu AstraZeneca vaccine pek ṭan tum a ni a, sorkar chuan July thlaah an ram mipui maktaduai 10-te hnenah vaccine hi pek hman a tum a ni. 

Mahse South Korea-a doctor pawl lian ber, Korean Medical Association (KMA) chuan Parliament-a doctor jail tangte license tihtawpsakna tur bill siam pass a nih chuan lungawi lohna lantir an tum tih an sawi a ni. KMA thupuangtu, Kim Dae-ha chuan, "He bill vang hian doctor, an duh vang reng ni lo, an hna nena inkaihhnawihna nei miah lo, tihsual palh vanga thiam loh changte chu an license titawp sakin, an eizawnna thlengin tihchhiatsak vek an ni thei dawn a ni," tiin he bill hi an dodal zel dawn tih a sawi. 

Association president Choi Dae-zip pawhin he bill hi 'bill nunrawng' tak a ni tiin, Parliament-in a pass a, law-a chantir a nih chuan hri leng dona kawngah leh vaccine pek chhuahna tura sorkar nena an thawhhona chu a tichhe dawn a ni, a ti. Nawrh hauihawt an ṭan hun tur erawh an la sawilang lo. 

SKorea sorkar chuan Covid-19 vaccine pekchhuahna turin ram pumah inoculation centre 250 leh clinic 10,000 vel a ruahman tawh a, mahse doctor-te nena an thawhdunna a chhiat chuan ruahman lawk angin vaccine pek hna pawh hi an kalpui theih a rinawm lo a ni.