Venezuela-in inrawlh turin UN a ngen

Venezuela chuan United Nations High Commissioner for Human Rights, Michelle Bachelet hnenah US-in sumdawnna leh sum lama an ram a hrek mek chuan Venezuela economy a nghawng nasa hle tih sawiin; he thilah hian inrawlh thuai turin a ngen. 

Geneva, Switzerland-a UN Human Rights Coun­cil session neihnaah, Venezuela Vice Foreign Minister William Castillo chuan he hrekna hi hlih thuai a ṭul thu a sawi. US hrekna siam hian Vene­zuela-in a leiba rulhna tura a hmalakna turte a tihbahlah phah a, ramdangte nena an insum­dawn tawnna thlengin a nghawng a ni, a ti. Venezuela chuan oil man tlakhniam vang leh economy lama hrek a nih avangin sum lamah harsatna a tawk mek a ni, tiin a sawi. Sorkar paih­thlak tuma beihna te, inthah tuma inphiarrukna leh industry pawi­khawih tihchhiat tumna an hmachhawn tawh tih a sawi bawk. 

Sorkar tihchhiat tuma beihna a awm fo chungin sorkar chuan mipuite dinhmun siamṭhatna turin social policy hrang hrang a kalpui mek a, heng zingah hian chenna in leh ei tur pekna turte pawh a tel tih Castillo chuan a sawi. "Kum riat chhungin in maktaduai 2.6 chuang sak a ni tawh a, hei hi mi maktaduai 12 velin an chhawr a ni," a ti. Chhung­kaw maktaduai 6-te chuan khawsakna atan an mamawh thilte an dawn ṭhin thu a sawi.