Ethiopian-Israeli-ten nawrh chhunzawm leh dawn
Israel rama Ethiopian-Israeli te chuan chi inthliarna leh police-te chet dana lungawi lohna an lantir chu vawiin aṭangin an chhunzawm leh dawn tih Inrinni zan khan an sawi.
June 30-a Israel police officer duty lai pawh ni loin Haifa-a Ethiopian-Israeli Solomon Tekah a kahhlum avangin July 2 khan lungawi lohna an lo lantir tawh a, hemi ṭum hian police-te nen pawh an innawr buai nasa hle. Mahse Tekah chhungten Juda-te insun hun, ni sarih chhung chu nawrh huaihawt rih lo tura an ngen avangin an chawl a, insun hun hi nimin khan a tawp avangin nawrh hi huaihawt chhunzawm leh an tum a ni.
Vawiin hian Tel Aviv-a Azrieli intersection-ah lungawi lohna lantir tum a ni a, chi inthliarna awm ṭhin an do zel dawn tih an sawi. Solomon Tekah chunga thil thleng ang chu midang chunga a thlen nawn tawh lohna turin an bei zel dawn tih an sawi bawk.