Ukraine Preisdent-in Putin nena inbiak rawt
Ukraine president Voldymyr Zelensky chuan an ram khawchhak lam, kum 2014-a Russia-in Ukraine aṭanga Crimea bial a laksak leh an ram khawchhak lama buaina thleng mek chinfel dan kawng ngaihtuah turin Russia president Vladimir Putin nena inbiakna neih a rawt.
Zelenksy hian hemi chungchang hi social media video a tihchhuahah sawi langin, Putin chu Minsk, Belarus-a inbiakna neihpuiah a sawm a ni. Ukraine President chuan Russia-in a luah, Crimea leh Ukraine khawchhak lam, kum nga chhung zet tualchhung buaina thlen tawhna chungchang chu Putin nena an sawidun a ngai tih a sawi. Ukraine khawchhak lamah hian sipaite leh helte an inbei reng a, helte hi Russia chuan a pui ve thung a ni. He buaina vang hian mi 13,000 chuang zetin nunna an chan tawh tih United Nations chuan a lo sawi tawh.
"Crimea bial hi tu ta nge tih leh Donbass bialah hian tute nge awm tihte hi kan sawiho a ngai a ni," tiin Zelensky chuan a sawi. Donbass tia sawi, Donetsk leh Luhansk bialah hian Ukraine sipai nena inbei, helpawlte chu Russia hian a pui nia sawi a ni a, mahse Russia chuan hei hi a pha thung.