UN-in khawvel sorkar-te muang lutukah a puh

United Nations (UN) chuan Nilainia report a tihchhuahah khawvel sorkarte chuan sik leh sa danglam chak lutuk venna kawngah hma an la muang hle tih a tarlang. Report-in a tarlan zel danin sik leh sa danglam zel venna kawnga hmalakna hian retheihna a ti tlemin, intluktlanna a thlen thei tih a tarlang.

UN chuan khawvel sorkar­te chu 2030 Sustainable De­ve­lopment Goals (SDGs) tih­hlawhtlin tumna nei tak tak lo, abikin intluktlanna kalpuina kawngah leh sik leh sa danglam chak lutuk venna kawngah an muang hlein a hria.

Khawvel ram 193-te telna leh mi 2000 chuang inhmuhkhawmna UN High-level Political Forum on Sustainable Development-ah UN hian a thil chhuichhuahte hi a puang chhuak a ni. Head of UN Economic and Social Affairs, Liu Zhenmin chuan sik leh sa danglam zel venna kawnga hmalak­na hlawhtling tak nei tur hian hunin a nghak lo a, hun a tlem tawh hle tih a sawi. Khawvel-in buaina a neih chu khawvelin a siam ṭhat hna a thawh a ngai a, retheihna, intluktlan lohna, sik leh sa danglam leh khawvel buaina dangte chu a inthlunzawm vek tih a sawi bawk.

UN document chuan South Asia leh sub-Saharan Africa a naupang 75% vel chuan taksa ṭhanlennaah harsatna nasa tak an tawk tih a tarlang a, sik leh sa danglam zelin a nghawng nasat bik ram - risk state-ah phei chuan inthiarna mumal nei lo leh tui intur ṭha mumal hmu lo an tam hle tih a tarlang bawk. Liu chuan renewable leh non-polluting sources of energy lama hmalakna chuan ramngaw a ti nung tharin sustainable agriculture chuan rilṭamna leh tlakchhamnate a tih ziaawm phah hle tih sawi a, retheihnain a tihbuai zinga 80% chu thingtlanga cheng an ni, a ti.