PNG-a tribal-te inbeihnaah mi 24 an thi
Papua New Guinea Highland area-a tribal zingah chi leh chi inkarah inbeihna a thleng a, mi 24 an thi. Thi zingah hian naupang leh hmeichhia eng emaw zat an tel.
Hela province-a tribal hnam inkara buaina hi hun eng emaw chen a lo thleng tawh a, ni thum chhungin mi 24-in nunna an chan tawh a ni. Report ṭhenkhat chuan thi zat hi hei ai hian an tam zawk tih an tarlang.
Prime minister James Marape chuan he thil thleng hi pawi a tih thu sawiin, pawikhawihna chawk chhuaktute chu zawn chhuah ngei a tiam. Hela governor Philip Undialu pawhin hrehawm a tih thu sawiin; hun rei tak chi leh chi inkara buaina awm tawh chuan inthahna hi a chawk chhuak ta tih a sawi.
Highland province hi a awmna a hlain, a chengker em em a, tlawhpawh pawh a harsa. Helai hmuna thingtlang ṭhenkhatte phei chu lirthei kal theih lohna a ni. Highland-a chi leh chi intihbuaina hi thil thleng fo a ni a, buaina chhuah chhan ṭhenkhatte chu inpawngsual vangte, rukruk vangte leh ramri buai vangte a ni tlangpui ṭhin.
Papua New Guinea hi kum 1975 September 16-a independence an hmuh hnu aṭang khan khawvela ram rethei berte zingah an la tel a, United Nations tarlan danin mipui zaa zela 40 bawr vel hian ni khatah US dollar 1 an thawkchhuak pha lo a ni.