Iran-in oil tanker chhuah turin Britain nawr

Iran Foreign Ministry chuan kar hmasaa Strait of Gibraltar-a Britain-in an oil tanker a man sak chu chhuah thuai turin a nawr. 

Ministry thupuangtu Abbas Mousavi chuan Britain-in oil tanker a manna chhan chhuanlam a siam chu thu dik lo a nih thu a sawi. Kar kal ta Ningani khan British Royal Marines-te chuan Strait of Gibraltar-ah Syria pana kal, Iran oil tanker chu EU hrekna siam mek bawhchhiaah puhin an man sak tih khawthlang media-te chuan an sawi. Spain acting forest minister chuan US ngenna avanga Iran tanker hi man a nih thu a sawi bawk. 

Mousavi chuan US-in infiamna hlauhawm tak a kalpui mekah tel ve lo turin Britain chu a chah. Iran oil tanker man a ni chu thil dik lo leh awm lo tak a nih thu a sawi. Iran president Hassan Rou­hani hian, Iran oil tanker mansak an nih vang hian Britain chuan a nghawng a la tuar ngei dawn tiin a lo vau tawh a ni. 

Iran Expediency Discernment Council secretary Mohsen Rezaei chuan, Britain-in oil tanker chu an chhuahsak duh lo a nih chuan, British oil tanker an mansak ve mai tur thu a sawi bawk.