NKorea danpui tharah Head of State-ah Kim Jong-un puang

North Korea-in an ram danpui thar a tihchhuahah Kim Jong-un chu Head of State leh military commander-in-chief-ah official-a puan a ni. 

He danpui thar hi Ningani khan Naenara state portal site-ah tlangzarh a ni. Kim chu kum 2016-a din, top governing body State Affairs Commission (SAC) chairman a nih thu tarlan a ni a; Korean mipui zawng zawng aiawhtu lu ber tia sawi a ni. Danpui siamṭhatah hian NKorea ram chu 'nuclear weapons state' tia sawi chhunzawm a la ni bawk. 

Danpui hmasaah khan Kim chu 'supreme leader' tia sawi tawp a ni a, an ram sipai hotu tih a ni. A hma chuan North Korea official head chu parliament, Supreme People's Assembly president a ni ṭhin. Researcher ṭhenkhat chuan NKorea ram hotu title thlak a nih chhan chu US nena inremna kawng zawnga inbiakna an neih atana an inbuatsaihna pakhat nia an ngaih thu an sawi. US leh NKorea hian Korean Peninsula aṭanga nuclear ralthuam tihbo chungchangah inbiakna an lo nei tawh a, hun eng emaw chen inbiakna hi tihkhaihlak ni tawh mah se tun thla chhung chuan an chhunzawm leh theih beisei a ni.