US-a Covid-19 vanga thite sunna atan hnam puanzar a ngul chanveah zar turin ti

US President Joe Biden chuan an ramah Covid-19 hripui vanga thi mi nuai nga an tlin hnuah, Thawhṭanniah sorkar buiding zawng zawngah thite sunna atan an hnam puanzar chu a ngul chanveah zar vek turin a ti.

White House-ah hripui vanga thite sunna hmangin minute khat ngawi rengin an awm a, candle-lightning ceremony hun hman a ni bawk. Sunna hun hmanah hian President Biden bakah first lady Jill Biden, vice president Kamala Harris leh a pasal, second gentleman Doug Emhoff pawh an tel. 

Press Secretary Jen Psaki chuan thite sunna hun hi ni nga chhung an hmang dawn tih a sawi. President Biden chuan hripui vanga an mi hmangaih tak tak an chante tawrhna chu a hriatthiampui hle tih a sawi. Hemi rual hian hripui leng mek chu an la do hneh ngei dawn tih America mipuite a hrilh nghal bawk. 

US-a Covid-19 hri vanga thi hi Indopui II-na, Korea leh Vietnam war-a America mi thi zawng zawng belhkhawm aiin an tam tawh zawk a ni. Indopui II-naah khan America mi 4,05,000, Vietnam War-ah 58,000 leh Korean War-ah  36,000 an thi nia record a ni.