WHO hotuin COVAX scheme ngaihthah lo turin ngen

World Health Organisation (WHO) in ram hrang hrang, ram rethei zawkte pawh huama Covid-19 vaccine rualkhai taka sem a nih theihna tura COVAX scheme a siam chu ram hausa zawkten ngaihthah lo tura a duh thu WHO director general Tedros Adhanom Ghebreyesus chuan a sawi. 

Ghebreyesus chuan ram hausa zawkten Covid-19 vaccine an order belh hmain, ram rethei zawkten vaccine an dawn ve theihna tur kawng an dal dawn tih ngaihtuah phawt tura a duh thu a sawi a ni. Ram ropui leh hausa zawkte chuan coronavirus vaccine hi dose maktaduai tel an nei tawh a, ram ṭhenkhatin an ram mipui zawng zawng pek theih zat turte an order tawh bawk a ni. Hetihlai hian ram rethei zawkah vaccine hi dose tlemte chauh la nei leh, la nei ve miah lote an la awm thung.

Hripui leng mek hi tihbo a nih theihna tur chuan khawvel pumah vaccine pek hna hi hlawhtling taka kalpui a ngai dawn a ni. Europe ramte chuan COVAX scheme hi an thlawp thu sawiin, anmahni ram puala vaccine dose an order pawh sem ṭhen dan an ngaihtuah dawn tih an sawi a, mahse a hun erawh an la sawilang lo.