Israel-in Palestinian sum tur a hreksak

Israel security cabinet chuan Palestian Authority(PA) hnena a sum pek tur, dollar maktaduai 138 chu Israel mi beitu Palestinian mi, jail-a tangte PA-in a ṭanpui ṭhin avangin hreksak turin a rel. 

Prime Minister Benjamin Netanyahu-a office chuan thuchhuah siamin, pawisa an hreksak tur hi nikuma PA-in Israel rama tang, Palestinian mi chhungte hnenah leh heng mi tangte an chhuah theihna tura PA-in sum a sen zat ang a nih thu a sawi. 

Israel chuan a chhiah lak, PA hnena a transfer tur hi pek a nih chuan tharum thawhna nasa zawk a thlen a hlauhthawnawm niin a sawi. Israel hian Israel lawngchawlh hmun kaltlanga Palestinian te tana bungraw phurh luhah chhiah a lo la ṭhin a, heng a chhiah lakte hi PA hnenah a pe chhawng leh ṭhin a ni. Thla khat chhunga a chhiah lak hi US maktaduai 127 vel a tling ṭhin. 

Hetihlai hian PA chuan Palestinian mi tang chhungte hnena sum a pek chhan chu chhungkaw eizawngtu ber an tan avanga chhawmdawlna atana pe an ni tih sawiin, pawikhawihna thlentir tumna lam a ni lo tih a sawi. Israel leh Palestinian te inkara inbeihna thleng vangin Palestinian mi thi leh man tawk eng emaw zat an awm a, thite chu Palestinian hruaitute chuan martar angin an ngai a ni. 

Senior Palestine Liberation Organisation official Ahmed Majdalani chuan Israel leh United States chu an ram blackmail tumah a puh. US hian Palestinian-te chhawmdawlna a pek ṭhin chu a lo titawp tawh bawk a ni.