Trump-an IS firfiak mante thubuai ngaihtuah turin ngen
US President Donald Trump chuan Europe ramte hnenah Islamic State (IS) firfiak an mante thubuia chu ngaihtuah turin a ngen. Firfiak man hi 800 an chuang nia sawi a ni.
President Trump chuan a twitter-ah, Britain, France, Germany leh Europe ram dangte chu Syria rama IS firfiak man 800 chuang zinga an ram mite awmte chu hruai kir a, an ramah ngei an thubuai ngaihtuah sak turin a ni.
Kum 2014 khan IS-in Syria leh Iraq ram huam chhungah an lal ram an din thu an puang a, mahse Syria leh Iraq sipaite bakah US kaihhruaia ṭangrual ramten IS firfiakte hi an beih hnuah firfiak pawl hian an ram lak tam zawk chu an chan leh tawh a, tunah hian Iraq ramri bula ram kilometer khat bial vel chauh an luah tawh a ni.
Kurdish kaihhruai Syrian Democratic Forces (SDF) chuan IS firfiakte nena hun rei tak an inbeih chhung hian firfiak pawl tana thawktua puh, ramdang mi eng emaw zat an man a, an zingah hian hmeichhiate pawh an tel a ni. Kurds-te chuan heng ramdang mi an mante hi an rawn kalna ramte hnenah hruaikir turin an ngen fo a, mahse tun thlengin an la hruaikir lo.
US President hian nikum December thla khan Syria-a US sipaite lakchhuah an ni tur thu hi a lo puang tawh a, hei vang hian America sipai lakchhuah an nih hnuah security lama dinhmun a chhiat phah hlauhthawnna a tam hle. Hei vang hian US pawhin Europe ramte hnenah Syria-a firfiak man, an ram mite chu hruai kir thuai turin a ngen a ni.
Trump chuan IS lalram chu a tluchhe mai tawh dawn a, hei vang hian firfiak an mante hi an rawn kalna ramten an hruai kir thuai loh chuan chhuah mai a ngaih hun a awm dawn niin a sawi. US chuan heng firfiakten hi Europe rama an inzarpharh leh a duh lo a ni, a ti.
President Trump-a ngenna hi France, Belgium leh Germany chuan an chhang nghal a, France junior interior minister Laurent Nunez chuan firfiakte chu Kurds ho man an ni a, hei vang an chungthu ngaihtuah tur hian Kurds-te chu an ring tawk tih a sawi. Belgium leh Germany te chuan thil awmdan an zirchian mek thu an sawi.