Nepal-ah Tuilian vangin mi 43 an thi

Nepal ramah ruahsur nasa vanga tuilianin chhiatna a thlenah mi 43 an thi tawh a, mi 18 in hliam an tuar. Thi zingah hian hmeichhia 18 an tel. 

Kar kal ta Ningani aṭang khan district 25 chuangah ruah nasa takin a sur a, nimin thleng khan ruah hi a la sur chhunzawm reng a, tuilian hian chhungkaw 10,385 vel a nghawng a ni. Police-te chuan hmun hrang hrang aṭangin tuilian tuar mi 1,104 an chhanchhuak tawh a, an zinga mi 185 chu an ram khawpui Kathmandu aṭanga chhanchhuah an ni. 

Police-te chuan harsatna tawkte chhanchhuah leh chhawmdawl hna thawk turin police 27,380 an thawkchhuak tih an sawi. Flood Forecasting Section (FFS) chuan ruah hi a la sur chhun­zawm zel dawn tih a puang a, Meteorological Forecasting Division (MFD) pawhin mipuite inralring turin a hriattir bawk. 

Ruahsur nasa avangin lui hrang hrang pawh an lian tawh hle a, Bagmati, Kamala, Saptakoshi leh a lui pengte chuan hlauhawm chhinchhiahna an pel tawh a ni.