Obama tihbuai duh vangin Trump-a'n nuclear deal titawp

United States (US)-a Britain ambassador hlui memo a put ru a, Iran nuclear deal aṭanga US President Donald Trump a inhnuhdawh chhan chu a thlak tak, president hlui Barack Obama a tihbuai duh vang chauh nia tarlan a ni. 

Iran leh world power ram parukten nuclear deal an ziah hi Barack Obama president hun laia siam a ni. 

Memo putru hi tunhnai lawka UK ambassador hlui Sir Kim Darroch ziah a ni a, nuclear deal chungchanga Trump thutlukna siam chu Obama a tihmangan leh tihthinur duh vang chauh niin a sawi. Memo-ah hian Trump-a inhnuhdawhna chhan chu mimal thil vang chauh a ni tih sawiin, hei hi ram inpalai tawnna sawisakna a ni, a ti. 

Hetihlai hian President Trump chuan Iran nuclear deal aṭanga US a inhnuhdawhna chhan chu inremna hi a ṭhat tawk loh vang tih a sawi thung. Kum 2015-a inremna an ziahah hian Iran-in nuclear kaihhnawih lam a khawih theih chu bihthliah sak a ni a, hemi chhanletna atan hian world power ram parukte hian economy lama Iran an hrekna chu an thlahdul ve bawk. Mahse he inremna aṭanga US a inhnuhdawh hnuah Iran a hrekna pawh hi a hmang zui leh tawh a ni.