Ukraine TV channel Grenade hmanga beih a ni
Ukraine rama TV channel pakhat '112 Ukraine' building chu Inrinni khan an ram khawpui Kiev-ah rocket-propelled-grenade (RGP) hmanga beih a ni a, thi leh hliam an awm lo.
He inbeihna hi documentary pakhat, Russian president Vladimir Putin leh pro-Russian politician Viktor Medvedchuk-ten Ukraine chungchanga documentary an neiha show an pek chhuah laia thleng a ni.
Police-te chuan building hi an ram huna chawhnu dar 3:40 vela beih a nih thu an sawi. Helpawlte chetna a nih thu thuneitute chuan an sawi bawk. Mahse tute tih nge tih chu hriat a la ni lo a, grenade kah chhuahna launcher chu he thil thlenna hmunah hian hnutchhiah a ni.
Police-te chuan he pawikhawihna thlenga mawhphurtu man ngei tumin Kiev khawpuiah hian security an ti khauh nghal a ni. He thil thleng hi state security service SBU-ten an chhui mek. 112 Ukraine channel-a CEO Yegor Benkendorf chuan Ukraine president Volodymyr Zelensky chu an channel beitu firfiakte chu hrem ngei an nih theih nana hma la turin a ngen a, he channel hian an programme ruahmansate chu inbeihna thleng vang hian an cancel vek rih a ni.
Ukraine sipaite hi Moscow-in a ṭanpui, separatist-te nen Eastern Ukraine lamah an la inbeih chhunzawm renga, 112 Ukraine channel neitu Kozak chu Russia president Putin-a eptu Medvedchuk supporter ni a hriat a ni bawk.